Raila Odinga, wari mu batavuga rumwe n’ubutegetsi muri Kenya yaguye mu Buhinde mu gitondo cyo kuri uyu wa Gatatu, tariki 15 Ukwakira, aho yari yaragiye kwivuza.
Polisi yo mu Buhinde yatangaje ko yapfuye ubwo yari arimo agendagenda ari kumwe na mushiki we, umukobwa we ndetse n’umuganga we, ubwo yituraga hasi. Yakorewe ubutabazi agezwa kwa muganga ariko birangira ashizemo umwuka.
Raila Odinga ni umunyapolitiki w’Umunya-Kenya wabaye minisitiri w’Intebe kuva mu 2008 kugeza mu 2013.
Ni umuhungu wa Jaramogi Odinga Odinga wabaye visi perezida wa mbere ku butegetsi bwa Jomo Kenyatta nyuma gato y’ubwigenge bwa Kenya wapfuye wapfuye mu 1994.
Raila Odinga yiyamamaje mu matora ya perezida ariko ntiyabasha gutsinda haba mu 1997, 2007, 2013, 2017 na 2022 ndetse amakuru avuga ko yiteguraga kongera kwiyamamaza mu 2027.
Ari mu itsinda ry’abakekwagaho kugerageza guhirika ubutegetsi mu 1982 ubwo bari bagambiriye gukuraho guverinoma ya Daniel Arap Moi.
Mu 2007, Odinga yagaragarijwe igikundiro n’abantu benshi byatumye hari abibwira ko ari we watsinze amatora ya perezida ubwo yari ahatanye na Mwai Kibaki. Itangazwa ry’uko Kibaki ari we watsinze ryakuruye intugunda mu gihugu n’imyigaragambyo yaguyemo abatari bake.
