Ikipe ya Rayon Sports yatandukanye na myugariro wayo, Serumogo Ally, nyuma yo kwandagaza na Al Hilal yayitsinze ibitego 4-0 kuri uyu wa gatandatu tariki 17 Mutarama 2026 kuri Stade Amahoro.
Al Hilal SC yatsinze Rayon Sports ibitego 4-0, ihita yicara ku mwanya wa mbere wa Shampiyona y’u Rwanda n’amanota 35 nyuma y’imikino 15 imaze gukina. Iyi kipe izigamye ibitego 29.
Rayon Sports ya cyenda n’amanota 24, isigaje umukino wa Al Merrikh ku wa Gatatu utaha na Mukura VS ku wa Gatandatu.
Muri uyu mukino, Serumogo Ally yakinnye, yasimbuwe ku munota wa 64 hajyamo Nshimiyimana Emmanuel ‘Kabange’.
Mu itangazo ryashyizwe hanze n’ikipe nyuma y’umukino, yashimiye Serumoga wari na Kapiteni w’iyi kipe ku ruhare rwe mu myaka ibiri n’igice ayimazemo.
Serumogo yageze muri Rayon Sports mu 2023 avuye muri Kiyovu Sports, gusa mu mwaka ushize yari yongereye amasezerano ye.
