Mu gitondo cyo kuri iki Cyumweru tariki 7 Ukuboza 2025, itsinda ry’abasirikare ba Bénin riyobowe na Lt Col Pascal Tigri ryigambye ko ryahiritse ubutegetsi bwa Perezida Patrice Talon, rishinja gutonesha bamwe no gufunga abandi.
Ibi ryabitangarije kuri Televiziyo y’igihugu, ORTB, mu gitondo cyo kuri iki cyumweru.
Inkuru dukesha Jeune Afrique, ivuga ko mbere yo kujya gutangaza ko bwakuye Perezida Talon ku butegetsi, babanje kwinjira mu Rugo rwa Perezida Patrice Talon, ariko abashinzwe umutekano we bababera ibamba kugeza babasubije inyuma.
Mbere y’uko televiziyo ikurwa ku murongo, iryo tsinda ry’abasirikare bayobowe na Lt Col Pascal Tigri, wari ukuriye ingabo zidasanzwe, ryatangaje ko risheshe itegeko nshinga, inteko ishinga amategeko, inzego zose za leta ndetse n’imipaka ihuza iki gihugu n’ibindi ifunzwe.
Minisitiri w’imari, Romuald Wadagni, yahamirije iki kinyamakuru ko ubu ibintu bimeze neza nubwo hari bimwe bakiri gutunganya ariko umutekano ari wose mu Murwa Mukuru Coutonu kandi ubutegetsi bukiriho.
Perezida Patrice Talon yagiye ku butegetsi mu 2016 biteganyijwe ko azasoza manda ze mu 2026 ahateganyijwe amatora mu ntangiriro z’uwo mwaka.
