Kuri uyu wa 5 Ukuboza 2025, u Rwanda na Leta Zunze Ubumwe za Amerika basinyanye amasezerano y’ubufatanye mu rwego rw’ubuzima, afite agaciro ka miliyoni 228$, uyashyize mu manyarwanda yaba miliyari 330 Frw.
Aya masezerano yasinyiwe i Washington D.C, ku ruhande rw’u Rwanda yashyizweho umukono na Minisitiri w’Ububanyi n’Amahanga n’Ubutwererane, Amb. Olivier Nduhungirehe, na ho ku ruhande rwa Leta Zunze Ubumwe za Amerika yari Jeremy Lewin, Umuyobozi Mukuru wungirije ushinzwe Ubufasha mpuzamahanga, Ibikorwa by’Ubutabazi n’Ubwisanzure bw’ukwemera.
Mu itangazo ryasohowe na Minisiteri y’Ububanyi n’Amahanga ya Leta Zunze Ubumwe za Amerika, ryavugaga ko mu myaka mike ishize, u Rwanda rwateye intambwe ifatika mu guhangana na Virusi itera SIDA no gukomeza urwego rw’ubuzima.
Riti “U Rwanda by’umwihariko, ni kimwe mu bihugu mbarwa byabashije kugera ku ntego ya 95-95-95 yo guhangana na Virusi itera SIDA.”
“bi bizatuma u Rwanda rwihuta mu rugendo rugana kuri serivisi z’ubuzima zirambye, zitanga umusaruro kandi zizewe, binajyane no gufasha u Rwanda kugenzura mu buryo bwuzuye ibisubizo byarwo mu guhangana na Virusi itera SIDA mu mwaka wa kane w’ubu bufatanye.”
Binyuze muri ubu bufatanye, hafatanyijwe n’Inteko Ishinga Amategeko, Leta Zunze Ubumwe za Amerika ziteganya gutanga miliyoni 158$ mu myaka itanu iri imbere, mu gushyigikira umuhate w’u Rwanda mu guhangana na Virusi itera SIDA, malaria n’izindi ndwara zandura no kongera imbaraga mu gukurikirana indwara no kwitegura kwihutira kugenzura ibyorezo bishobora kwaduka.
Aya masezerano kandi anagaragaza ubundi buryo bw’ubufatanye mu nzego z’ubuzima u Rwanda rukeneyemo ishoramari n’ubufatanye n’abikorera bo muri Leta Zunze Ubumwe za Amerika, burimo gukora imiti igezweho yo kuvura agakoko gatera SIDA (HIV), ndetse no gukoresha ikoranabuhanga rishingiye ku bwenge bw’ubukorano (AI) mu buvuzi.
