Ikipe ya Arsenal FC yanganyije na Chelsea igitego 1-1 mu mukino w’ishyiraniro w’Umunsi wa 13 wa Shampiyona y’u Bwongereza watanzwemo amakarita 8 hari n’itukura yahawe Moise Caisedo wa Chelsea mu gice cya mbere.
Uyu mukino wo kuri iki Cyumweru, tariki ya 30 Ugushyingo 2025, ni bwo ku bibuga bitandukanye mu Bwongereza hakiniwe imikino y’Umunsi wa 13 wa Shampiyona, kimwe no kuri Stamford Bridge.
Ku munota wa 13, Rutahizamu wa Arsenal, Bukayo Saka yabonye uburyo bwashoboraga kuvamo igitego atera ishoti rikomeye mu izamu rya Chelsea ufatwa n’umunyezamu Robert Sánchez.
Igice cya mbere cyarangiye amakipe yombi nta n’imwe irebye mu izamu, ariko kubera ishyaka ryari rihari ni nako amakosa yakorwaga ari menshi ndetse umusifuzi akayahana atababarira.
Mu minota 30 Arsenal yari imaze kubona amakarita atatu y’umuhondo harimo iyahawe Martin Zubimendi, Cristhian Mosquera na Riccardo Calafiori naho ku munota wa 38, Moise Caisedo wa Chelsea yakiniye nabi Mikel Merino wa Arsenal, umusifuzi w’umukino, Anthony Taylor, yifashisha amashusho ya VAR amuha ikarita itukura.
Ku munota wa 48 Chelsea yabonye igitego cyatsinzwe na Trevoh Chalobah ku mupira wari uvuye muri koruneri yatewe na Reece James.
Ku munota wa 59, Bukayo Saka yohereje umupira mu rubuga rw’amahina, usanga Mikel Merino ahagaze neza ahita ashyiramo igitego cyo kwishyura cya Arsenal.
Kugeza ubu Arsenal yakomeje kuyobora urutonde rwa Shampiyona y’u Bwongereza n’amanota 30, Chelsea iba iya gatatu n’amanota 24 ikurikiye Manchester City.
Indi mikino yo muri iyi shampiyona yakinwe kuri uyu munsi harimo uwa Liverpool yafashe umwanya wa munani n’amanota 21, nyuma yo gutsinda West Ham United ibitego 2-0 byinjijwe na Alexander Isak na Cody Gakpo.
Aston Villa yatsinze Wolves igitego 1-0 cya Boubacar Kamara, Nottingham Forest itsindwa na Brighton ibitego 2-0 byatsinzwe na Maxim De Cuyper na Stefanos Tzimas.
Joshua Zirkzee na Mason Mount bafashije Manchester United kubona amanota atatu ku bitego 2-1 yatsinze Crystal Palace yafashijwe na Jean-Philippe Mateta. Yagize amanota 21 aho iri ku mwanya wa gatandatu.
