Perezida wa Mozambique, Daniel Francisco Chapo, yasuye Inzego z’umutekano z’u Rwanda, RSF, ziri mu butumwa bw’amahoro zikorera mu Karere ka Ancuabe mu Ntara ya Cabo Delgado.
Muri uru ruzinduko, Perezida Chapo yari aherekejwe na Minisitiri w’Ingabo wa Mozambique, Maj Gen Cristovão Artur Chume, Umugaba Mukuru w’Ingabo za FADM, Gen Julio dos Santos Jane, Umugaba w’Ingabo zirwanira ku butaka, Maj Gen André Rafael Mahunguane, n’Ubuyobozi bw’Intara ya Cabo Delgado buyobowe na Valige Tauabo.
Yakiriwe n’Umuyobozi w’Inzego z’umutekano z’u Rwanda, Maj Gen Vincent Gatama ahabwa ishusho y’umutekano mu gace zikoreramo ndetse Perezida Chapo agirana ibiganiro n’izo nzego.
Perezida Chapo yashimye imirimo inzego z’umutekano zikora, abasaba gukomeza ingamba zigamije kurwanya ibikorwa by’iterabwoba.
Yagize ati “Ndashimira cyane Ingabo z’u Rwanda ku bw’akazi k’indashyikirwa zikora muri Mozambique, byatumye umutekano ugaruka muri iyi ntara. Mukomeze mukorere hamwe n’abavandimwe banyu hano, kuko nta terambere ryagerwaho hatari amahoro n’umutekano.”
Perezida Chapo yibukije ko iterabwoba atari ikibazo cya Mozambique gusa, ahubwo ari ikibazo cy’Isi yose, ari yo mpamvu ubumwe, ubufatanye buhamye n’imikoranire myiza hagati y’inzego z’umutekano z’u Rwanda n’Ingabo za Mozambique ari ingenzi mu kurirwanya.
Yabibukije ko imishinga itandukanye igiye gusubukurwa, bityo amahoro n’umutekano ari ingenzi mu kubungabunga ibikorwa by’iterambere by’igihe kirekire.
Kuva inzego z’umutekano zatangira gukorera muri Cabo Delgado, zirukanye ibyihebe, zibikura mu birindiro bihoraho byari byarashinze mu turere dutandukanye, bihungira mu mashyamba.
Muri Kanama 2025, Guverinoma y’u Rwanda n’iya Mozambique zavuguruye amasezerano y’ubufatanye mu ishoramari no kurwanya iterabwoba.
