Umuyobozi w’Ihuriro AFC/M23 rirwanya Ubutegetsi bwa Repubulika Iharanira Demokarasi ya Congo, Corneille Nangaa Yobeluo, yavuze ko yifuza ko imiyoborere y’iki gihugu yahinduka n’izina ry’igihugu rigahinduka.
Izina Repubulika Iharanira Demokarasi ya Congo, DR Congo, yaryiswe mu 1997 ku Ngoma ya Laurent Désiré Kabila amaze gukuraho Ubutegetsi bwa Mobutu Sese Seko wari urambye ku buyobozi bw’ikitwaga Zaïre.
Mu byo Nangaa yagaragaje, yavuze ko AFC/M23 yifuza impinduka mu miyoborere ya RDC, aho intara zose zazahabwa ubwigenge mu buryo bwa ‘federalisme’ ndetse n’igihugu kikitwa irindi zina.
Fédéralisme, ni uburyo bw’imitegekere, aho intara cyangwa Leta ishobora kugira ubuyobozi bwigenga, ikigenzurira umutungo wayo ariko hakaba n’ububasha igirwaho n’ubuyobozi bwo ku rwego rw’igihugu, hashingiwe ku Itegeko Nshinga.
AFC/M23 igaragaza ko mu gihe intara zo muri RDC zugarijwe n’ibibazo bitandukanye, imiyoborere ishingiye ku murwa mukuru atari yo ishobora kubikemura, bityo ko igihe ari iki ngo Abanye-Congo batangire ibiganiro mpaka kuri ‘fédéralisme’.
Yagize ati “Icyerekezo cyacu nk’ihuriro ni uko icyitwa RDC uyu munsi kigomba guhinduka Republique Fédéralisme du Congo. Kandi nta bwoba dutewe no kubivuga. Ni yo mahitamo, ni icyerekezo.”
Nangaa yatangaje ko iri huriro riharanira ko Abanye-Congo bose bagerwaho n’umusaruro w’aho batuye, bitandukanye n’uko bimeze ubu kuko ab’i Kinshasa baryamira abandi.
Yasobanuye ko ‘fédéralisme’ yatanze umusaruro mwiza muri Amerika, mu Budage, mu Bubiligi, muri Leta Zunze Ubumwe z’Abarabu, u Busuwisi, Canada, Nigeria n’ibindi bihugu byinshi, bityo ko na RDC ikwiye kugira iyi miyoborere.
AFC/M23 isaba ko inzego z’ibanze zagenzura urwego rw’ubucukuzi bw’amabuye y’agaciro, ubuhinzi n’ubworozi, ubukerarugendo, urw’umuco, amashyamba, ibikorwaremezo ndetse n’ingufu, Kinshasa ikagumana ububasha ku nzego nkuru eshatu gusa, ari zo: igisirikare, ububanyi n’amahanga ndetse n’urw’imisoro.
