Impunzi z’Abarundi 115 zari zimaze imyaka igera ku 10 zarahungiye mu Rwanda zatashye ku bushake zishimira u Rwanda rwazakiye neza kugeza ubwo zifashijwe gutaha iwabo mu gihugu cyababyaye.
Izi mpunzi zasubiye iwabo zinyuze ku Mupaka wa Nemba mu Karere ka Bugesera kuri uyu wa kabiri tariki 25 Ugushyingo 2025 zari zarahunze imvururu zabaye iwabo mu mwaka wa 2015.
Mu batashye 115 barimo abagore 58 n’abana 51 bo mu miryango 58 harimo abantu 107 babaga mu Nkambi ya Mahama n’abandi umunani babaga i Kigali.
Umuyobozi ushinzwe gahunda z’Impunzi muri Minisiteri y’Ibikorwa by’Ubutabazi, Karagire Gonzague yavuze ko gucyura izo mpunzi byakozwe hashingiwe ku busabe bwazo.
Ati “Icyemezo cyo gutaha ni bo bacyifatira noneho Leta bahunze n’iyabakiriye hamwe n’Ishami ry’Umuryango w’Abibumbye ryita ku Mpunzi bagategura uburyo bataha. Ibyo byose hamwe n’ubufasha bahabwa bageze iwabo biba biteguye barabihabwa.”
Bamwe mu batashye kuri iyi nshuro, bavuga ko nubwo ubuhunzi ari ubuzima bugoye bishimira ko mu Rwanda bakiriwe neza ndetse bakaba batashye iwabo nta kivazo bahagiriye.
Ndayishimiye Eric, ni umwe muri bo, yagize ati “Bari badufashe neza kuko twabonaga ibyo kurya n’imyambaro ku gihe nta kibazo. Twaje niga mu wa mbere w’amashuri abanza ngeze mu nkambi nkomereza amashuri aho nari ngeze ubu nari ndi mu wa kane w’ayisumbuye ariko nize n’imyuga yo gutwara moto no gukanika ibinyabiziga.”
Bamuhorubusa Aziza nawe yagize ati “Naje mfite abana babiri ariko ubu ngize batanu. Twarakurikiranye twumva iwacu amahoro yaragarutse ndavuga nti ‘mu myaka 10 u Rwanda rwarakoze nta kibazo twagize uretse imbogamizi z’ubuzima n’abandi bahura na zo, hano ubuyobozi bwagerageje kutwitaho rwose n’abana bange nta kibazo bagize.”
Imibare ya Minisiteri y’Ibikorwa by’Ubutabazi igaragaza ko kuva ku itariki 27, 2020 impunzi z’Abarundi zimaze gutaha zose hamwe ari 30.907.
Ni mu gihe hakiri izindi 52.862 ziri mu Rwanda barimo abagera kuri 42.421 bari mu Nkambi ya Mahama n’abandi bari ahandi hatari mu nkambi.
