Leta Zunze Ubumwe za Amerika zemeje ko Ukraine yemeye umushinga w’amasezerano y’amahoro wateguwe na Perezida Donald Trump, nubwo harimo ingingo nke zo kunozwa kandi ko biganisha ku kurangiza intambara n’Uburusiya na Ukraine.
Intumwa za Leta Zunze Ubumwe za Amerika ziyobowe n’Umunyamabanga w’igisirikare, Daniel Driscoll, ziri mu biganiro n’iz’u Burusiya i Abu Dhabi muri Leta Zunze Ubumwe z’Abarabu kuri uyu mushinga.
Umwe mu bayobozi bo muri Leta Zunze Ubumwe za Amerika, yemereye CNN ko Ukraine yemeye uyu mushinga w’amahoro ati “Abanya-Ukraine bemeye uyu mushinga w’amahoro. Hari ibintu bito bikwiye guhabwa umurongo ariko bemeye umushinga w’amahoro.”
Kuwa 23 Ugushyingo, intumwa za Amerika n’iza Ukraine zahuriye i Genève mu Busuwisi, zumvikana ku by’ingenzi bigize uyu mushinga nk’uko byatangajwe na Rustem Umerov, Umunyamabanga w’Inama ya Ukraine ishinzwe umutekano n’igisirikare.
Rustem yatangarije ku rubuga nkoranyambaga X ko nyuma yo kumvikana na Amerika, Ukraine itegereje ko ibihugu by’inshuti bigize umuryango w’Ubumwe bw’u Burayi bibafasha mu zindi ntambwe.
Mu gitondo cyo kuri uyu wa 25 Ugushyingo, Perezida Volodymyr Zelenskyy wa Ukraine yatangaje ko nubwo ibiganiro bya Genève byatanze icyizere ko kugera ku mahoro bishoboka, imbere hakiri akazi kenshi.
Zelensky yagize ati “Nyuma y’ibiganiro bya Genève, turabona uburyo bwinshi bwatuma inzira y’amahoro iba impamo. Hari ibyavuye mu biganiro bifatika kandi imbere haracyari akazi kenshi.”
Uyu mushinga ugizwe n’ingingo 28. Uteganya ko Ukraine izahagarika kugenzura intara ya Donetsk, Luhansk n’ikirwa cya Crimea, itazajya mu muryango NATO kandi ko izagabanya ingabo zayo zikava ku bihumbi 800 zikagera ku bihumbi 600.
Uteganya ko Ukraine, u Burusiya na NATO bizagirana amasezerano yo kwirinda ubushotoranyi kandi Ukraine ikizezwa ko niyongera kugabwaho ibitero, izatabarwa na Amerika n’ibihugu byo mu muryango w’Ubumwe bw’u Burayi.
Ubwo uyu mushinga wajyaga hanze, Zelenskyy yatangaje ko Ukraine itazemera ingingo zose zibangamira ubusugire n’inyungu zayo, cyane cyane ivuga ku kwemera kutagenzura ibice byayo.
