Umuryango Uharanira uburenganzira bwa muntu, ARDHO, werekanye ko hari bamwe mu bayobozi b’inzego z’ibanze bihunza inshingano zo gukemura ibibazo by’abaturage usanga bahora babasunikira kugana inkiko bikongera ubucucike mu magororero n’umuvare w’imanza.
Uyu muryango wemeza ko hari ibibazo bigaragara mu nkiko ariko wabikurikirana ugasanga abayobozi b’inzego z’ibanze iyo bakora inshingano zabo neza byari kuba byarakemuwe bidasabye inkiko.
Ubwo hahugurwaga abakozi b’Urwego rw’Igihugu Rushinzwe Igorora bashinzwe kurengera uburenganzira bwa muntu mu magororero yo mu Gihugu n’abanyamategeko, Umunyamabanga Nshingwabikorwa w’Umuryango ARDHO, Munyagasiza Jonas, yerekanye ko abo bayobozi baba bakwiye gukora inshingano neza badakemura ibibazo by’abaturage.
Yagize ati “Nicyo twanavugaga, dufite abayobozi b’inzego z’ibanze wagira ngo bashinzwe transfer y’ibyaha! Wamuregera aho kugira ngo akemure ikibazo akagitransfer ku murenge niba ari mudugudu aracyohereza ku kagari niba ari ku kagari acyohereze ku murenge n’umurenge ucyohereze muri RIB.”
“Ni uko nguko abantu bisanga muri gereza ari benshi, wagira ngo abayobozi twitoreye b’inzego z’ibanze bashinzwe transfer y’ibibazo ntabwo bashinzwe kubikemura ni cyo kibazo gikomeye turabafite benshi!”
Uyu muyobozi akomeza avuga ko hakwiye kwigwa ubundi buryo bwo gukemura ibibazo aho kwihutira gufunga biteza ingaruka z’ubucucike mu magororero cyane hagakoreshwa uburyo bw’ubuhuza kuko busigasira imibanire myiza.
Ati “Nari maze kubabwira urugero rw’umuntu watemye igiti mu ishyamba rya mugenzi we ubu ngubu akaba amaze imyaka 3 ataraburana ategereje iminsi 30, urumva atari akarengane? Igiti gifite agaciro k’ibihumbi 15 ese wa muntu iyo haza kuba ubuhuza ntabwo yari kuriha ibihumbi 30 ariko ntate umuryango we?”
“Turacyafite umuco wo kumva yuko gufunga aricyo gihano, ntabwo aricyo gihano ushobora gufunga umuntu umwe ukaba wishe abantu 7 yasize, birasaba gutekereza rero ntitwumve ko igihano ari ugufungwa gusa.”
Umuvugizi wa RSC, CSP Sengabo Hillary, avuga ko n’ubwo ubucucike bukigaragara mu magororero yo mu Rwanda hari icyizere ko buzashira kuko bugenda bugabanyuka.
Ati “Ubucucike bwavuye mu 130 bugera ku 103 murumva ko mu gihe gito ubucucike mu gihe gito buzaba bacitse. Ubutumwa dutanga ni uko abantu bakomeza kugirira icyizere amagororero kuko tubaha serivisi yubahirije amategeko.”
Raporo y’Urwego rw’Ubucamanza igaragaza ko mu mwaka w’Ubucamanza 2024/2025, umubare w’imanza zarangiriye mu buhuza wiyongereye ku kigero cya 32% kuko zabaye 3. 166 zivuye ku 2.395 mu mwaka wa 2023/2024.
