Minisitiri w’Intebe, Dr. Justin Nsengiyumva, yakiriye Minisitiri w’Intebe wungirije akaba na Minisitiri w’Ububanyi n’Amahanga n’Ubufatanye Mpuzamahanga wa Cambodia, Prak Sokhonn, bagirana ibiganiro by’imibanire, ubufatanye hasinywa n’amasezerano mashya.
Aba bayobozi bombi bahuye kuri uyu wa 18 Ugushyingo 2025, i Kigali baganira ku kwagura umubano hagati y’ibihugu byombi, ubufatanye mu nzego zitandukanye hanasinywa amasezerano mashya.
Mu masezerano mashya yasinywe uyu munsi harimo amasezerano y’Ubujyanama hagati y’Ibihugu byombi n’amasezerano yo kuvanaho viza ku bafite Pasiporo z’Abadipolomate n’iz’akazi.
Minisitiri w’Intebe Wungirije Prak Sokhonn yashimye uburyo u Rwanda rwakiriye neza abitabiriye inama ya OIF n’imigendekere myiza y’imyiteguro yayo, naho Minisitiri w’Intebe Dr. Justin Nsengiyumva ashimira Cambodia, yitegura gufata umwanya wo kuyobora OIF ndetse ayifuriza kuzakira neza Inama ya 20 ya Francophonie.
