Ikigo cy’Igihugu Gishinzwe Iterambere ry’Ubuhinzi n’Ubworozi mu Rwanda, RAB, cyatangaje ko cyavanyeho ingamba z’akato kari karashyiriweho amatungo yo mu mirenge imwe n’imwe yo mu Karere ka Rubavu yagaragayemo indwara y’uburenge.
Iyi ndwara yari yagaragaye mu Mirenge ya Kanama, Nyakiliba na Kanzenze muri Ukwakura 2025, hahita hafatwa ingamba zo kuba hashyizwe mu kato hirindwa ko iyo ndwara yakomeza gukwirakwira ahantu henshi.
Ku wa 16 Ugushyingo 2025, nibwo RAB yatangaje ko hashingiwe ku Itegeko no 54/ 2008 ryo ku wa 10/09/ 2008 rigenga uburyo bwo kwirinda no kurwanya indwara zandura amatungo mu Rwanda, mu ngingo yaryo ya 2 n’iya 49 isobanura akato ku ndwara y’uburenge n’uburyo kavanwaho.
RAB yagize iti “Icyemezo cyari cyafashwe cyo guhagarika ingendo z’amatungo afite ibinono (inka, ihene, intama n’ingurube) ku mpamvu iyo ari yo yose (kororwa, kugurishwa, kubagwa) no guhagarika icuruzwa ry’ibikomoka kuri ayo matungo muri iyo mirenge cyavanyweho.”
Yasabye “Ubuyobozi bw’inzego z’ibanze n’aborozi barasabwa gukomeza kwita ku buzima bw’amatungo no gutanga amakuru igihe cyose hagaragaye cyangwa hakekwa ibimenyetso by’indwara y’uburenge cyangwa izindi ndwara zidasanzwe zagaragara mu matungo.”
Indwara y’uburenge, (Foot and Mouth Disease), izwiho kwandura vuba no kumara igihe kinini mu matungo yanduye, ikaba ishobora guteza igihombo gikomeye mu bworozi n’ubukungu bw’abaturage.
