Musonera Germain wari Umukandida Depite muri RPF mu matora ya 2024 yahamijwe icyaha cy’ubufatanyacyaha muri Jenoside yakorewe Abatutsi ahanishwa igihano cy’igifungo cy’imyaka 20 no gutanga indishyi ya miliyoni 50Frw.
Urukiko rwamuhamije ubufatanyacyaha ku cyaha cya Jenoside nyuma yo kwemeza ko ikirego cy’Ubushinjacyaha gifite ishingiro rumuhanisha igihano cy’igifungo cy’imyaka 20, runamutegeka guha IBUKA indishyi z’akababaro zingana n’amafaranga miliyoni 50 y’u Rwanda.
Ubushinjacyaha ku rwego Rwisumbuye rwa Muhanga, bwasobanuye ko yayoboraga urubyiruko muri Komini Nyabikenke, mu gihe cya Jenoside yakorewe Abatutsi mu 1994, buvuga kandi ko, usibye uwo mwanya yari afite, yari anafite akabari Interahamwe zanyweragamo zivuye kwica Abatutsi, ndetse akaba yaratunze imbunda ebyiri.
Musonera Germain we, yahakanye ibyaha byose ashinjwa, avuga ko mu gihe cya Jenoside yakorewe Abatutsi mu 1994 atari i Nyabikenke, kuko icyo gihe yari yarasubiye kwiga. Umuryango Uharanira Inyungu z’Abarokotse Jenocide yakorewe Abatutsi, IBUKA, wo wasabaga indishyi z’akababaro za miliyoni 500Frw.
Uyu mugabo yakoze mu nzego zitandukanye harimo no mu Biro bya Minisitiri w’Intebe, aho yavuye ashaka kwiyamamariza kuba Umudepite uhagarariye Umuryango RPF-Inkotanyi, muri iyi manda nibwo yaje gufatwa arafungwa.
