Komisiyo Ishinzwe Gusezerera no Gusubiza mu Buzima Busanzwe abahoze ari abasirikare, ,RDRC, yasezereye icyiciro cya 76 cy’abahoze mu mitwe yitwaje intwaro muri Repubulika Iharanira Demokarasi ya Congo.
Abagize iki cyiciro, ni 214 barimo 178 bari abasirikare barimo abagore barindwi bahoze mu mitwe yitwaje intwaro mu mashyamba ya DR Congo irimo FDLR n’indi mitwe byifatanyije basoje amahugurwa abafasha kujya mu buzima busanzwe.
Umuyobozi wa Komisiyo y’Igihugu yo gusezerera no gusubiza mu buzima busanzwe abahoze ari abasirikare, Nyirahabineza Valerie, yasabye ubufatanye bwa buri wese mu kwirinda gukomeza kwishora mu mitwe yitwaje intwaro kuko umubare munini w’abasoje amahugurwa wiganjemo abo muri Rubavu.
Yagize ati “FDLR iraza igatwara urubyiruko cyangwa igatuma intumwa, bakambuka ku buryo bworoshye cyane. Ni yo mpamvu twifuza ubufatanye nk’Abanyarwanda ngo dukangurire urubyiruko kwima amatwi ababashuka.”
Mu buhamya bwa bamwe mu basezerewe bahoze mu mitwe yitwaje intwaro, bahuriza ku ngengabitekerezo mbi y’urwango bahora bacengeza bagasaba abakiri mu mashyamba ya DR Congo gutaha bagafatanya n’abandi kubaka igihugu.
Niyonzima Jean Damascene, ni umwe mu basezerewe, yagize ati “Twarababwiye ngo izo mvugo tugomba kuzireka ahubwo tugakoresha igihutu. Ibyo byarumvikanye ndetse turanakorana, baduhereza abahungu babo muri FDLR dushinga umutwe wa Nyatura twafatanyaga gutera urugamba.”
” Kubera iyo ngengabitekerezo yamaze gucengera mu mitwe y’abantu, kuyivanamo bisaba imbaraga za buri wese dukangurira aba bantu gutaha kuko mu Rwanda ni amahoro baze dufatanye n’abandi mu iterambere.”
Guverineri w’Intara y’Amajyaruguru, Mugabowagahunde Maurice, yasabye abasubijwe mu buzima busanzwe kugaragaza impinduka mu bitekerezo no mu migenzereze, gusigasira umutekano w’igihugu no gufatanya n’abandi mu rugendo rwo kwivana mu bukene bakiteza imbere.
Ati “Ndabasaba kuzirinda amacakubiri n’ingengabitekerezo ya Jenoside, ndabasaba kuzirinda ikibi, gukomera ku bumwe n’ubudaheranwa kuko ari zo mbaraga zacu, kuzaharanira gukora cyane mukiteza imbere muri byose.”
Yakomeje agira ati”Muzabe intumwa nziza mukangurira bagenzi banyu mwasize mu mashyamba kurambika intwaro hasi bagataha, turabasaba no kunyomoza ibihuha byinshi, abaharabika u Rwanda bahora bavuga, bikaba bituma bagenzi banyu badataha.”
Abasubijwe mu buzima busanzwe bo muri iki cyiciro cya 76, abagera kuri 162 ni abo mu Karere ka Rubavu mu mirenge ya Mudende, Bugeshi, Gisenyi, Nyamyumba, Busasamana, Cyanzarwe, Kanama na Kanzenze aho Umurenge wa Mudende ufitemo abantu 33.
Kuva AFC/M23 yafata ibice binini bya Kivu zombi, abanyarwanda bari baragizwe ingwate na FDLR batangiye gutaha ku bwinshi ndetse basubizwa mu buzima busanzwe.
Kuva Komisiyo yo gusezerera no gusubiza mu buzima busanzwe abari abasirikare yatangira, abagera ku 12,686 biganjemo abahoze muri FDLR bamaze gusezererwa basubizwa mu buzima busanzwe nyuma yo kwigishwa uburere mboneragihugu n’imyuga itandukanye.
