Al Hilal SC yo muri Sudani ikina Shampiyona y’u Rwanda yatsinze Mamelodi Sundowns yo muri Afurika y’Epfo, ibitego 2-1 mu mukino w’Umunsi wa Kane wa CAF Champions League biyihesha kuyobora itsinda C n’amanota 8.
Uyu mukino wabereye kuri Stade Amahoro kuri uyu wa Gatanu tariki ya 30 Mutarama 2026.
Igitego cya mbere cya Al Hilal SC cyabonetse ku munota wa 45, ubwo Ebuela Steven yatanze umupira mwiza, Abdelrazig Taha akorerwa ikosa n’umunyezamu Onyango umusifuzi atanga penaliti yinjijwe na kapiteni Mohamed Yagub Yousif.
Ku munota wa 60, Mamelodi Sundowns yishyuye igitego cya mbere cyatsinzwe na Arthur De Oliviera Sales ku ishoti ryiza yateye rigendera hejuru.
Igitego cya kabiri cya Al Hilal SC cyabonetse mu minota ya nyuma gitsinzwe na Jean-Claude Girumugisha ku ishoti yatereye kure.
Umukino warangiye Al Hilal SC yatsinze Mamelodi Sundowns ibitego 2-1 ifata umwanya wa mbere n’amanota umunani ikurikiwe n’iyi yo muri Afurika y’Epfo ifite atanu.
Undi mukino wo muri iri tsinda C, uzahuza MC Alger ya nyuma ifite inota rimwe na FC Saint-Éloi Lupopo ya gatatu ifite ane, ku Cyumweru, tariki ya 1 Gashyantare 2026.
