Ikipe ya Paris Saint-Germain yegukanye FIFA Intercontinental Cup 2025 itsinze Flamengo yo muri Brésil mu mukino hitabajwemo penaliti nyuma yo kunganya igitego 1-1 mu minota 120 rwabuze gica.
Iyi Kipe yo mu Bufaransa, yatsinze Flamengo penaliti 2-1 mu mukino wa nyuma wabereye muri Ahmad bin Ali Stadium i Doha kuri uyu wa Gatatu, tariki ya 17 Ukuboza 2025, wahuje PSG yatwaye UEFA Champions League i Burayi na Flamengo yatwaye Copa Libertadores muri Amerika y’Amajyepfo.
PSG yatangiye yotsa igitutu Flamengo, maze munota wa cyenda Fabián Ruiz atsinda igitego ariko ikoranabuhanga ry’amashusho rigaeagaza ko umunyezamu wa Flamengo yari yasubije umupira mu kibuga wageze hanze, hatangwa koruneri.
Ku munota wa 38, Khvicha Kvaratskhelia yatsinze igitego cya PSG cyishyuwe ku munota wa 62 gitsinzwe na Jorginho kuri penaliti yaturutse ku ikosa ryakozwe na Marquinhos wakiniye nabi Giorgian de Arrascaeta mu rubuga rw’amahina.
Iminota 90 y’umukino yarangiye gutyo ari 1-1, hongerwaho indi 30 nayo yarangiye bikiri 1-1 bituma hitabazwa penaliti, hinjiye ebyiri ku ruhande rwa PSG zatsinzwe na Vitinha na Nuno Mendes.
Ku ruhande rwa Flamengo, penaliti imwe rukumbi yinjijwe na Diego De la Cruz mu gihe Ousmane Dembélé na Barcola bahushije iya kabiri n’iya kane ku ruhande rwa PSG naho Saúl, Pedro, Léo Pereira na Luiz de Araújo bahusha enye zikurikiranye ku ruhande rwa Flamengo.
Byatumye Ikipe ya Paris Saint-Germain yubaka ibigwi kuko mu mwaka umwe, yegukanye ibikombe birimo Trophée des Champions, Ligue 1, Coupe de France, UEFA Champions League, UEFA Super Cup na FIFA Intercontinental Cup.
