Inama Nkuru y’Ishyirahamwe ry’Umupira w’Amaguru ku Isi, FIFA, ryatangaje ko amafaranga azahabwa amakipe azitabira Igikombe cy’Isi cya 2026 aziyongera kuko hazakoreshwa agera kuri miliyoni 727$, angana na miliyari 1058,8Frw.
Iyi nama yateranye kuri uyu wa Gatatu, tariki ya 17 Ukuboza 2025, yemeje ko ikipe izatwara iki Gikombe izahabwa miliyoni 50 z’Amadolari ya Amerika kandi ko buri kipe izitabira iri rushanwa izahabwa miliyoni 1,5 z’Amadolari yo kwitegura.
Yemeje kandi ko Ikipe ya kabiri izahabwa miliyoni 33 z’Amadolari ya Amerika naho amakipe 16 atazabasha kurenga amatsinda azabona miliyoni 9 z’Amadolari.
Inama Nkuru ya FIFA yemeje kandi guhera mu 2026 hazatangira gukinwa amarushanwa ahuza abatarengeje 15 mu bahungu naho mu 2027 hagatangira amarushanwa y’abakobwa.
Ni mu gihe Igikombe cy’Isi cy’Amakipe mu Bagore kizaba ku nshuro ya mbere tariki 5-30 Mutarama 2028.
Uko amakipe azahembwa mu Gikombe cy’Isi cya 2026:
Ikipe izegukana igikombe: Miliyoni 50$
Ikipe ya kabiri: Miliyoni 33$
Ikipe ya gatatu: Miliyoni 29$
Ikipe ya kane: Miliyoni 27$
Ikipe izaviramo muri ¼: Miliyoni 19$
Ikipe izaviramo muri 1/8: Miliyoni 15$
Ikipe zizasezererwa muri 1/16: Miliyoni 11$
Ikipe zizaviramo mu matsinda: Miliyoni 9$
Buri kipe yabonye/izabona itike: Miliyoni 1,5$
