Lomami Marcel wanyuze muri Rayon Sports mu bihe bitandukanye yongeye kugirwa Umutoza wungirije akazafatanya na Haruna Ferouz wasigaranye ikipe nyuma yo gusezerera Afahmia Lotfi na Azouz Lotfi.
Uyu Mutoza, yatangajwe n’Ubuyobozi bwa Rayon Sports kuri uyu wa Mbere, tariki ya 15 Ukuboza 2025, nyuma y’ibiganiro bamaze iminsi bagirana.
Lomami Marcel yakiniye Rayon Sports yabaye umutoza wungirije mu 2018 ubwo yakoranaga na Karekezi Olivier, 2021 Lomami yasigaranye ikipe imaze kwirukana Masudi Djuma bakoranaga, ndetse no mu 2022 ayifatanya na Guy Bukasa.
Lomami Marcel kandi yanyuze mu makipe atandukanye arimo Kiyovu Sports, Gasogi United na Gorilla FC.
Rayon Sports iri ku mwanya wa gatanu n’amanota 17 nyuma y’imikino 11 imaze gukina, ikaba iri kwitegura guhura na Gorilla FC, mu mukino w’Umunsi wa 12 wa Rwanda Premier League, iri kwiyubaka kuko hari n’amakuru avuga ko iri gushaka umutoza mukuru ndetse ikaba iri no gushaka abandi bakinnyi.
