Minisiteri y’Ubutegetsi bw’Igihugu, yashizeho abayobozi b’agateganyo bagomba kuyobora Akarere ka Kayonza mu gihe hategerejwe amatora azakorwa hashakwa abagomba gusimbura abari bagize Komite Nyobozi yirukanywe.
Aba bayobozi bashyizweho kuri uyu wa Mbere tariki ya 8 Ukuboza 2025, ni Hategekimana Fred wari Umunyamabanga Nshingwabikorwa w’Akarere ka Nyagatare, yagizwe Umuyobozi w’Akarere ka Kayonza w’agateganyo na Jules Higiro wagizwe Umuyobozi w’Akarere wungirije w’agateganyo.
Hategekimana Fred wagizwe Meya w’agateganyo yagiye mu mwanya w’Umunyamabanga Nshingwabikorwa w’Akarere ka Nyagatare, avuye ku kuba Umuyobozi ushinzwe Imari mu Karere ka Kayonza.
Jules Higiro wagizwe Umuyobozi wungirije w’Agateganyo we yari asanzwe ari umujyanama muri Minisiteri y’Ubutegetsi bw’Igihugu.
Ku Cyumweru tariki 7 Ukuboza, ni bwo Inama Njyanama yirukanye abari bagize Komite Nyobozi y’Akarere ka Kayonza barimo uwari Umuyobozi w’Akarere, Nyemazi John Bosco, uwari Visi Meya ushizwe Iterambere ry’Ubukungu, Munganyinka Hope ndetse n’uwari Visi Meya ushinzwe imibereho myiza, Harerimana Jean Damascene.
Aba bayobozi birukanywe bazira amakosa bakozi arimo kudatanga amakuru ku kibazo cy’inzara cyari kiri mu mirenge ya Ndego, Mwiri, Kabare na Rwinkwavu, kugeza ubwo abaturage batangiye gusuhuka. Byanavuzwe ko hari serivisi zindi batatangaga neza.
Minisitiri w’Ubutegetsi bw’Igihugu, Dominique Habimana yemeje ko bahisemo gushyiraho abo bayobozi kubera akazi kenshi kariyo gasaba ubufatanye no kuzuzanya ngo gashobore gukorwa.
Ati “Kuba ari babiri, ibyo ni Minisiteri ibigena dushingiye ku bintu bitandukanye, byashoboraga no kuba umwe ariko mu busesenguzi twakoze twabonye ko inshingano bafite, akazi kari muri Kayonza ari ngombwa ko baba ari babiri kugira ngo bafatanye, buzuzanye muri iyi minsi mu gihe bategereje ko haba amatora yo gushyiraho abandi bayobozi.”
Inama Njyanama y’Akarere ka Kayonza ku wa 7 Ukuboza 2025 yirukanye abari bagize Komite Nyobozi y’Akarere barimo uwari Umuyobozi w’Akarere, Nyemazi John Bosco, uwari Visi Meya ushizwe Iterambere ry’Ubukungu, Munganyinka Hope ndetse n’uwari Visi Meya ushinzwe imibereho myiza, Harerimana Jean Damascene.
Aba bayobozi birukanywe bazira amakosa bakoze arimo kudatanga amakuru ku kibazo cy’inzara cyari kiri mu mirenge ya Ndego, Mwiri, Kabare na Rwinkwavu, kugeza ubwo abaturage batangiye gusuhuka, ibindi bakoze birimo gutukana no gutanga serivisi mbi.
