Mu kiganiro n’abanyamakuru cyo kuri uyu wa 27 Ugushyingo 2025, Perezida Paul Kagame yahamije ko ikibazo cya serivisi mbi kidakwiye kwihanganira n’uwo ari we wese asabanya abanyarwanda ahereye ku banyamakuru kujya bavuga aho bahawe iyo serivisi mbi kandi ntibatinye no kugaragariza abayibahaye ko bidakwiye.
Ubwo yabazwaga ku bipimo by’imitangire ya serivisi mu Rwanda, byagaragajwe n’Urwego rw’Imiyoborere, RGB, byerekanye ko ibyo bipimo biri hasi, Umukuru w’Igihugu yavuze ko abanyarwanda ubwabo bakwiye kwanga serivisi mbi kandi bakabigaragaza.
Yagize ati “Abanyarwanda muri rusange, mukwiye kwanga serivisi mbi muhabwa mukayishyurira, ukagenda utanavuze, mukwiye kubyanga. Aho baguhaye serivisi mbi ukwiye kuhavuga, uwayiguhaye ni nde? Vuga uti ahangaha batanga serivisi mbi, nawe nk’umunyamakuru ukwiye kubatanga.”
Ati “Aho kubivuga murabiceceka, mukabihisha, cyangwa mugashyiramo abo mufitanye amasinde gusa. Hari abo mutavuga, cyangwa mukavuga ababoroheye. Mukwiye kubishyira hanze uko bimeze. Inzego za Leta zikwiye kubikurikirana, na bo batabikora bafite abagomba kubibabaza.”
Perezida Kagame yavuze ku nsengero zimwe na zimwe zafunzwe mu bihe byashize ahamya ko iyaba ari we atakongera kuzifungura, ahubwo abantu bagashishikarizwa gukora kuko mu nsengero higanjemo ububandi.
Ati “Iyo biba jye nta nsengero nafungura. N’ibyo dukora tubikora kugira ngo abantu nyine… na ho insengero mu iterambere, muri ibi byose twavugaga by’intambara ziri ku Isi n’imibereho y’igihugu insengero zifitemo ruhare ki?”
Perezida Kagame yagaragaje ko ikigaragara cyane ari uko mu nsengero habamo ubujura n’ububandi kurusha ibindi.
Ati “Na zo ziratanga akazi se? Bariba, ariko muba hehe mwebwe? Jye ibyo mbona ko ari abantu buzuyemo ububandi gusa. Kurwana n’ababandi bari mu nsengero na byo nta mpuhwe mbifitiye na busa rwose. Ariko mwebwe abakoloni barabarindagije namwe murarindagira, ubu twirirwe tuganira ku bintu by’insengero, mujye guhinga mworore.”
Isesengura ryakozwe n’Urwego rw’u Rwanda rw’Imiyoborere, RGB, muri Nyakanga na Kanama 2024 ku nsengero zirenga 13.770 ziri mu bice bitandukanye by’igihugu, ryasize 9.171 muri zo zifunzwe kubera kutubahiriza ibiteganywa n’amategeko.
Hakurikiyeho amabwiriza imiryango ishingiye ku myemerere igomba kubahiriza arimo n’ibigomba kuba biri mu rusengero rwemerewe gukorerwamo kugira ngo habungabungwe ubuzima bw’abaturage bazigana.
