Perezida w’Igihugu cya Nigeria, Bola Tinubu, yashyizeho ibihe bidasanzwe kugira ngo hitabwe ku kibazo cy’ishimutwa ry’abantu biganjemo abanyeshuri kimaze gufata intera ndende.
Perezida Bola Tinubu, yatangaje ibihe bidasanzwe kugira ngo hoherezwe ingabo mu bice birimo umutekano muke uturuka ku ishimutwa ry’abantu biganjemo abanyeshuri, ndetse yategetse ko umubare w’abapolisi wongerwa mu rwego rwo guhangana n’iki kibazo.
Yagize ati “Hashyizweho ibihe bidasanzwe mu gihe turi kohereza ingabo mu duce dufite ikibazo cy’umutekano.”
Mu minsi mike ishize, abanyeshuri n’abarimu barenga 300 barashimuswe, n’abakobwa bato 13 bari bari kugenda hafi y’umurima bafatwa n’abagizi ba nabi barabatwara. Hari n’abandi bana 10 bashimuswe.
Bake muri aba bana bashimuswe bamaze gutabarwa ariko abandi barenga 256 n’abarimu bafashwe bakuwe ku kigo cy’ishuri rya kiliziya gatolika ku wa gatanu w’icyumweru gishize n’ubu ntibaraboneka.
Mu cyumweru gishize kandi, Umushumba wa Kiliziya Gatolika ku Isi, Papa Léon XIV yasabye inzego z’ubuyobozi bwa Nigeria gukora ibishoboka byose bakagarura abana bashimuswe.
