Polisi y’Igihugu yatangaje ko kuva muri Kanama kugeza mu Ukwakira 2025 habereye impanuka zikomeye 32 zahitanye ubuzima bw’abantu 17 kandi zose zaturutse ku burangare no kwica nkana amategeko y’umuhanda.
Mu bukangurambaga bwiswe “Turindane Tugereyo Amahoro” bukorwa na Polisi ifatanyije n’izindi nzego bugamije gukangurira abatwara ibinyabiziga n’abakoresha umuhanda muri rusange kwirinda impanuka ziwuberamo, hagaragajwe ko mu mezi atatu gusa habaye impanuka 32 zahitanye abantu 17.
Umuvugizi wa Polisi, Assistant Commossioner of Police, ACP, Bonaventure Rutikanga yashimiye Intara y’Amajyaruguru kuko n’ubwo habayeyo impanuka usanga zitaeavaye nyinshi, abibutsa ko kuzirinda bishoboka.
Ati “Muri iyi Ntara mu mezi atatu gusa, habereye impanuka zikomeye 32 zihitana ubuzima bw’abantu 17, abenshi biganje mu Karere ka Gakenke usanga bituruka no ku miterere yaho ariko usanga hakozwe amakosa yo kutubahiriza amategeko y’umuhanda bigateza impanuka.”
Yakomeje agira ati “Ibi tubabwira birashoboka ko twabyirinda mu gihe hubahirijwe amategeko y’umuhanda. Niyo mpamvu twese tugomba gufatanya tukigisha abantu ndetse buri wese akabigira ibye tukajya tubibutsa kuyubahiriza.”
Yakomeje ashishikariza abakoresha imihanda kwitwararika mu bihe by’iminsi mikuru isoza n’itangira umwaka kuko ibyishimo bidakwiye kuzakurikirwa n’umubabaro habayeho kwirara.
Ati “Icyo twifuza nj uko umunezero utavamo ibyago. Abatwara amagare nabo bazirikane ko umutekano wabo utarindwa n’amategeko ngo babigire impamvu yo kwica amategeko y’umuhanda ahubwo nibirinde ubwabo bayubahirize.”
Komiseri w’Ishami rya Polisi y’u Rwanda rishinzwe Ibikorwa n’Ituze rusange, CP George Rumanzi, yavuze ko gukumira impanuka zo mu muhanda bireba buri wese kuko impanuka nyinshi ziterwa n’imyitwarire mibi ya bamwe mu batwara ibinyabiziga n’abagenzi batitwararika iyo bakoresha umuhanda.
Kuva muri Mutarama kugeza mu kwezi k’Ukuboza 2024, mu Rwanda habaye impanuka zo mu muhanda zisaga 9 000 zirimo izahitanye ubuzima bw’abantu 350.
Hashize imyaka Itandatu Polisi y’u Rwanda itangije ubukangurambaga bwa ‘Gerayo Amahoro’ bugamije gukangurira buri wese ukoresha umuhanda guhindura imyumvire, agafata ingamba ziganisha ku kugira uruhare ku mutekano we bwite n’uw’abandi basangiye umuhanda.
Ubu bukangurambaga bukomatanyije buzafasha inzego zose zirimo na Polisi kugabanya impanuka ariyo mpamvu buri wese asabwa kubigira ibye akirinda ariko akarinda na mugenzi we basangiye umuhanda
