Inzego zishinzwe ubutabazi zemeje ko abantu 90 bamaze guhitanwa n’inkongi y’umuriro yafashe mu nyubako za Wang Fuk Court i Hong Kong mu gihe abarenga 200 no batari baboneka kuko ubutabazi bugikomeje.
Bivugwa ko abapfuye benshi babonetse mu nyubako za Wang Cheong House na Wang Tai House n’ubwo hari n’ibindi bice bikekwa ko bashobora kubonekamo kuko ubutabazi bugikomeje kandi hari abarenga 200 batari baboneka.
Ibiro Ntaramakuru by’Abongereza, Reuters, dukesha iyi nkuru, byavuze ko Umuyobozi wungirije w’Ikigo cy’Ubutabazi bw’Inkongi, Derek Armstrong Chan, yavuze ko hari abaturage babonetse bakiri bazima, ariko ntiyatanze ibisobanuro birambuye.
Chan yasobanuye ibibazo bikomeye abashinzwe kuzimya inkongi bahuye nabyo, birimo umuriro wakwirakwiraga vuba cyane ndetse n’ibikoresho by’ubwubatsi byamanukaga ku nyubako hejuru bigatuma kuzigeraho bigorana.
Chan yavuze ko ibikorwa byo kuzimya inkongi byari hafi kurangira ati “Turacyazimya inkongi mu nyubako enye, kandi turacyagenzura inyubako zirindwi kugira ngo turinde n’ibisigaye ngo bitongera kwaka. Ikizakurikiraho ni ibikorwa byo gushakisha no gutabara abarokotse.
Kugeza ubu, imbangukiragutabara 177 zoherejwe mu bikorwa by’ubutabazi kugira ngo hagabanywe ibyago byo kuba abatabarwa bashobora kubura ubuzima nyuma y’ubutabazi.
