Ikipe ya Bugesera FC yatsinze Al Merrikh yo muri Sudani yemerewe gukina muri Shampiyona y’u Rwanda igitego 1-0 mu mukino wa Shampiyona y’u Rwanda wabereye kuri Stade y’Akarere ka Bugesera kuri uyu wa Kane, tariki ya 27 Ugushyingo 2025.
Muri uyu mukino, amakipe yombi yakinannye ishyaka kuko buri kipe yifuzaga amanota atatu kuko afite igisobanuro kinini kuko Al Merrikh iri mu makipe abiri ya nyuma yo na Al Hilal SC zombi zinjiriye rimwe muri Shampiyona y’u Rwanda.
Igice cya mbere cy’uyu mukino cyarangiye amakipe yombi anganya 0-0, mu cya kabiri Darko Nović utoza Al Merrikh akora impinduka akura mu kibuga Vinu Hasina ashyiramo Muhammad Asad ku munota wa 60.
Ku munota wa 70, Eric Ngendahimana yatsindiye igitego Bugesera FC, Al Merrikh ikora impinduka ikuramo Basheer Bangora na Mujtaba Faisal ishyiramo Musa Kamara na Al-Misbah Faisal.
Izi mpinduka ntacyo zafashije iyi kipe kuko yananiwe kwishyura, ikomeza kuba ku mwanya wa 17 n’amanota atatu, mu gihe Bugesera FC yagiye ku mwanya wa munani n’amanota 10 ku rutonde rw’agateganyo rwa Shampiyona y’u Rwanda.
