Ikipe ya Arsenal yatsinze Bayern Munich bari bahanganiye kuyobora urutonde rwa UEFA Champions League ibitego 3-1 ihita igira amanota 15 naho Bayern isigarana n’izindi kipe nyinshi zifite amanota 12 muri iri rushanwa.
Mu mikino w’Umunsi wa Gatanu wa UEFA Champions League wabaye mu ijoro ryo ku wa Gatatu, tariki ya 26 Ugushyingo 2025 kuri Emirates Stadium, ayo makipe yombi yaharaniraga kuyoboyora kuko yagiye gukina anganya amanota 12, byarangiye Arsenal yihariye umukino.
Umukino ntiwatinze kwisobanura kuko ku munota wa 22, Arsenal yafunguye amazamu ku gitego cyatsinzwe na Julian Timber n’umutwe, ku mupira wari uvuye muri koruneri yatewe neza na Bukayo Saka.
Bayern Munich yari igifite icyizere cyo gutsinda, ku munota wa 32 Joshua Kimmich yateye umupira muremure usaga Serge Gnabry awuhindura imbere y’izamu usanga Lennart Karl yishyura igitego.
Igice cya mbere cyarangiye amakipe yombi anganya igitego 1-1 ndetse agifite icyizere ko buri imwe yakwegukana amanota y’uyu munsi.
Bavuye mu kiruhuko, Arsenal yambara Visit Rwanda yatangiranye imbaraga nyinshi ndetse ku munota wa 69 Riccardo Calafiori azamukana umupira ku ruhande rw’ibumoso, awuhindura imbere y’izamu Noni Madueke atsinda igitego cya kabiri.
Igitego cya gatatu cya Arsenal cyatsinzwe na Gabriel Martinel yacomekewe umupira mwiza mu kibuga hagati umunyezamu Neuer asohoka nabi aramucenga azamuka yihuta atsinda igitego ku munota wa 77.
Indi mikino yabaye, Liverpool ikomeje kuba mu bihe bibi cyane yatsindiwe mu rugo na PSV Eindhoven ibitego 4-1, Real Madrid itsinda Olympiacos ibitego 4-3 birimo bitatu bya Kylian Mbappé.
Paris Saint Germain yatsinze Tottenham ibitego 5-3, Atletico Madrid itsinda Inter de Milan ibitego 2-1, mu gihe Atalanta yatsinze Frankfurt ibitego 3-0, Sporting Lisbon yatsinze Club Brugge ibitego 3-0, AS Monaco inganya na Pafos ibitego 2-2, mu gihe Copenhagen yatsinze Kairat ibitego 3-2.
Umunsi wa Gatanu wa UEFA Champions League wasize Arsenal itaratsindwa iri ku mwanya wa mbere n’amanota 15 ikurikiwe na PSG, Bayern Munich, Inter de Milan na Real Madrid zifite 12.
Borussia Dortmund ya gatandatu, Chelsea, Sporting, Manchester City na Atalanta zifite amanota 10. Ni mu gihe Liverpool iri ku mwanya wa 13 n’amanota icyenda, FC Barcelone ni iya 18 n’amanota arindwi.
Umunsi wa gatandatu uzakinwa tariki ya 9 n’iya 10 Ukuboza 2025 ahateganyijwe umukino ukomeye wa Real Madrid na Manchester City.
