Ikipe ya Chelsea FC yo mu Bwongereza yihereranye iya FC Barcelone yo muri Espagne iyitsinda ibitego 3-0 mu Irushanwa ry’Amakipe yabaye aya mbere iwayo, UEFA Champions League.
Mu mikino yabaye mu ijoro ryo kuri uyu wa Kabiri, tariki ya 25 Ugushyingo 2025, ni bwo ku bibuga byo mu bihugu bitandukanye hakiniwe imikino y’Umunsi wa Gatanu wa UEFA Champions League.
Chelsea yakiniraga iwayo yinjiye mu mukino mbere, igakina igana ku izamu rya FC Barcelone ndetse ku munota wa 24, Enzo Fernandez yinjiza igitego ariko amashusho ya VAR agaragaza ko yaraririye.
Bidatinze ku munota wa 27 w’umukino ubwo Chelsea yotsaga igitutu ubwugarizi bwa FC Barcelone, byarangiye Jules Koundé yitsinze ku mupira wari uhinduwe na Marc Cucurella.
Ku munota wa 44, Kapiteni wa FC Barcelone, Ronald Araújo, wari wahawe ikarita y’umuhondo kubera imyitwarire mibi, yakoreye irindi kosa Cucurella, ahita yerekwa ikarita itukura asohoka mu kibuga.
Igice cya mbere yarangiye Chelsea iyoboye, mu cya kabiri impande zombi zihita zikora impinduka. Enzo Maresca utoza Chelsea yakuyemo Malo Gusto ashyiramo Andrey Santos, naho Hansi Flick utoza FC Barcelone akuramo Ferran Torres ashyiramo Marcus Rashford.
Chelsea yakomeje kurusha FC Barcelone ndetse ku munota wa 51 Andrey ashyiramo igitego cya kabiri, umusifuzi aracyangwa avuga ko habayemo kurarira.
Igitego cya kabiri cya Chelsea cyatsinzwe na Estêvão Willian ku munota wa 55, ubwo yirukankanaga umupira asize Pau Cubarsí wananiwe kumuhagarika, akarinda atera ishoti mu izamu.
Enzo Fernandez yafashe umupira ku munota wa 73, abakinnyi ba FC Barcelone bagira ngo yaraririye, na we awuhereza Liam Delap wahise awushyira mu izamu arebana n’umunyezamu Joan García.
Uyu munsi wasize Manchester City itsinzwe na Bayer Leverkusen ibitego 2-0. Ibi byatsinzwe na Alejandro Grimaldo na Patrik Schick.
Kugeza ubu UEFA Champions League iyobowe na Bayern Munich y’amanota 12 n’ibitego 11 izigamye byose ikabinganya na Arsenal. Amakipe yombi ataratsindwa umukino n’umwe arahura kuri uyu wa Gatatu, tariki ya 26 Ugushyingo 2025.
Uko indi mikino yarangiye:
FK Bodø/Glimt 2-3 Juventus
Borussia Dortmund 4-0 Villareal
Marseille 2-1 Newcastle
Napoli 2-0 Qarabag
Slavia Prague 0-0 Athletic Club
Galatasaray S.K. 0-1 Royal Union SG
Ajax 0-2 Benfica
