Urwego rw’lgihugu rw’Imiyoborere ,RGB, rwahagaritse inzego zose zari ziyoboye Umuryango Rayon Sports zari zimaze igihe zidahuza, hashyirwaho ubuyobozi bw’inzibacyuho buyobowe na Murenzi Abdallah.
Icyemezo cyo gusesa izo nzego, cyafashwe kuri uyu wa 25 Ugushyingo 2025, ku cyicaro cya RGB nyuma y’inama yahuje ubuyobozi bwayo n’inzego zayoboraga Rayon Sports, ari zo Inama y’Ubutegetsi, Komite Nyobozi, Komite Ngenzuzi n’akanama nkemurampaka.
Komite y’agateganyo iyobowe na Murenzi Abdallah wari usanzwe ari Umunyamabanga w’Inama y’Ubutegetsi, mu gihe abandi bayigize ari Musabyimana Jean Baptiste, Gakwaya Olivier, Akayezu Josée na Me Nubumwe Jean Bosco.
Komite y’agateganyo kandi yahawe igihe cy’amezi atatu guhera kuri uyu wa Kabiri, tariki ya 25 Ugushyingo 2025. Ishinzwe kuvugurura amategeko y’Umuryango Rayon Sports mu nzego zawo no gushyiraho umurongo w’imiyoborere y’Umuryango.
Ni ku nshuro ya kabiri Urwego rw’Igihugu rw’Imiyoborere (RGB) rukemura ibibazo bya Rayon Sports muri ubu buryo, aho byaherukaga mu 2020 mu gihe inzego zasheshwe zari zimaze igihe cy’umwaka zikora kuko zagiyeho mu Ugushyingo 2024.
