Abasirikare bo muri Guinée-Bissau bakuye Perezida Umaro Sissoco Embaló ku butegetsi baramufunga ndetse hari n’abasirikare bakuru bamaze gufungwa.
Iri hirika ry’Ubutegetsi bwa Umaro Sissoc Embaló ryamenyekanye kuri uyu wa 26 Ugushyingo 2025 nyuma y’iminsi itatu habaye amatora y’Umukuru w’Igihugu uyu Muperezida akitangaza ko yayatsinze mu gihe Komisiyo y’amatora yo iteganya gutangaza ibyayavuyemo ku wa 27 Ugushyingo 2025.
France 24 yatangaje ko ihirikwa ry’ubutegetsi ryabanjirijwe n’urusaku rw’amasasu yumvikanye hafi y’Ingoro y’Umukuru w’Igihugu kandi ko abayikoze bahise basubika itangazwa ry’ibyavuye mu matora y’umukuru w’igihugu n’abagize inteko ishinga amategeko.
Iki kinyamakuru cyatangaje ko Umugaba Mukuru w’ingabo za Guinée, Gen Biague Na Ntan, Gen Mamadou Kourouma Touré umwungirije na Minisitiri w’Umutekano w’Imbere, Botché Candé, na bo bafunzwe.
Umaro yayoboraga Guinée kuva muri Gashyantare 2020. Inshuro nyinshi yikanze umugambi wo kumukura ku butegetsi, akora impinduka zikomeye mu gisirikare.
