Dr. Rubagumya Emmanuel, wari Perezida w’agateganyo wa AS Kigali yandikiye abanyamuryango bayo abasaba kutemera ubuyobozi bushya buheruka gutorwa buyobowe na Jean Chrysostome Rindiro avuga ko bunyuranyije n’amategeko.
Mu ibaruwa ya Dr. Rubagumya yandikiye abanyamuryango ba AS Kigali kuri uyu wa Kabiri, tariki ya 25 Ugushyingo 2025, yabasabaga ko batakwemera ubuyobozi bushya ngo kuko bwashyizweho hadashingiwe ku mategeko.
Mu byo yashingiyeho, agaragaza ko mu gihe hatorwaga ubuyobozi bushya ku cyumweru tari 23 Ugushyingo 2025, ngo hari abanyamuryango bake nabo bahuye mu buryo butemewe n’amategeko.
Yagize ati “Banyamuryango ba AS Kigali, tubandikiye tubamenyesha ko hari abanyamuryango bake cyane bahuye mu buryo butemewe n’amategeko batangaza ko bashyizeho ubuyobozi bwa AS Kigali.”
“Turamenyesha abanyamungo bose ko ubwo buyobozi bwishyizeho binyuranyije n’amategeko butemewe kandi ko mutagomba kurangazwa n’abo bantu.”
Dr. Rubagumya yongeyeho ko iki kibazo cyamenyeshejwe Urwego rw’Igihugu rw’Imiyoborere (RGB), kandi izabishakira igisubizo vuba.
Ku Cyumweru, tariki ya 23 Ugushyingo 2025, ni bwo hateranye Inteko Rusange ya AS Kigali, itorerwamo abayobozi bashya bazayobora manda itaha izageza mu 2029.
Abayobozi batowe ni Jean Chrysostome Rindiro, wungirijwe na Anne-Lise Alida Kankindi nka Visi Perezida, Fabrice Habanabakize nk’Umunyamabanga Mukuru, Chantal Habiyakare nk’Umubitsi, Jonathan Harindintwari nk’Umujyanama mu bya Tekinike na Yves Sangano wabaye Umajyanama mu Mategeko.
Ku cyumweru ubwo AS Kigali yakinaga na Rayon Sports yayitsinze ibitego 2-0, mu mukino w’Umunsi wa Munani wa Shampiyona y’u Rwanda.
Kugeza ubu iyi kipe iri ku mwanya wa 11 n’amanota umunani mu gihe yitegura gukina na APR FC tariki ya 28 Ugushyingo 2025.
