Musanze: DASSO yashyikirije inzu igezweho umuturage wabaga mu yo bitaga kiramujyanye

Urwego rwunganira akarere mu gucunga umutekano, DASSO, bo mu Karere ka Musanze, bashyikirije inzu igezweho, ibikoresho byo mu nzu n’ibiribwa Umuryango wa Ntibansekeye Félicien umwe mu bamugariye ku rugamba wabaga mu nzu bitaga kiramujyanye.

Uyu Muryango utuye mu Mudugudu wa Mubuga mu Kagari ka Cyanya mu Murenge wa Cyuve mu Karere ka Musanze, inzu n’ibindi bashyikirijwe byatwaye amafaranga y’u Rwanda agera kuri 6,750,000Frw.

Inzu bubakiwe na DASSO, ifite ibyumba bitatu n’uruganiriro, igikoni, ubwogero n’ubwiherero byo hanze, hashyizwemo kandi n’ibikoresho byo mu nzu mbere yo gushyikirizwa uwo muryango w’abantu barindwi.

Mu bindi bahawe birimo intebe zo mu ruganiriro, ibitanda bitatu ndetse bishyirwaho na matela, amashuka na couvlet lit zabyo, ibiribwa ndetse bashyirirwamo n’umuriro w’amashanyarazi.

Mbere y’uko uwo muryango wubakirwa, wari usanzwe ubayeho nabi kuko wabaga mu nzu imwe y’ibyumba bibiri nayo ishaje cyane kuko imvura yagwaga ikabanyagiriramo ku buryo bari bamaze umwaka barimuwe bagakodesherezwa kugira ngo iyo nzu itabahirimaho.

Umuhuzabikorwa wa DASSO wungirije mu Karere ka Musanze, Nshimiyimana Sosthene, avuga ko ibikorwa byo gufasha abatishoboye babikora bagamije kunganira akarere mu bikorwa byo gufasha abaturage kugira ubuzima bwiza no gutekana.

Yagize ati “Twamusanze mu nzu imeze nabi cyane bitaga kiramujyanye tubona ko tugomba kuyimukuramo, ubu DASSO si ugucunga umutekano byonyine, harimo no guteza imbere imibereho myiza y’abaturage kuko mu kunganira Akarere harimo no gushyira umuturage ku isonga tukamukorera.”

“Icyo dusaba uyu muryango twubakiye ni ugukora cyane bakiteza imbere kugira ngo abana bagiye kurerera aha hantu heza babeho neza, bige batere imbere. Natwe tuzakomeza kubasura kugira ngo dufatanye mu rugendo bagiyemo rw’iterambere.”

Umuryango wa Ntibansekeye Félicien na Mukarwego Marie Chantal, bubakiwe, bashimye ababatekereje bakabakura mu buzima bubi babizeza ko igiye kuba intambwe yo kwiteza imbere kuko ibyari bibabangamiye bikemutse.

Mukarwego yagize ati “Ndishimye cyane kuko mbere twabaga ahantu habi cyane kuko najyaga guca inshuro nabisigamo nkasanga babyibye nataka bati uriya se agira iki bamwiba? Ubuyobozi buradukodeshereza aho kuba. Ubu ndishimye cyane kuko mbonye inzu y’icyerekezo.”

Ntibansekeye nawe yagize ati “Ndishimye cyane kandi nshimiye urwego rwa DASSO kuba rwaratuzirikanye. Inzu twabagamo nayitaga kiramujyanye kuko igikoko cyashoboraga kuza kikakujyana, iyi banyubakiye ni Gisubizo.”

Umuyobozi w’Akarere ka Musanze wungirije ushinzwe imibereho myiza y’abaturage, Kayiranga Thèobald, yasabye abafashijwe gufata neza inzu bahawe bakayibungabunga kandi bagaharanira kwiteza imbere.

Yagize ati “Aba babafashije barigomwe cyane, ibyo babahaye byakwiye kuba bikora ibindi, bubaka ECD n’ibindi. Icyo tubasaba ni uguharanira kwigira inzu yaba hari aho yahomotse mukayisana ndetse mugakora cyane kuko bano ntabwo bazahora aribo babakemurira ibyo mwaba mushoboye kwikorera.”

Urwego rwunganira Akarere mu gucunga umutekano, DASSO, mu Karere ka Musanze rusanzwe rukora ibikorwa bitandukanye birimo kubakira abatishoboye, gutangira abatishoboye ubwisungane mu kwivuza, ibikorwa byo kurwanya isuri n’ibindi.

Mu Murenge wa Cyuve hubakiwe uyu muryango, hari indi miryango igera muri 90 ikeneye kubakirwa, gusanirwa no kuvugururirwa inzu kugira ngo iture aheza, kandi ibyo byose bigomba kugirwamo uruhare n’Akarere n’abafatanyabikorwa bako.