Amakuru Imikino

Musanze FC yeretse APR FC ko itari agafu k’imvugwarimwe iyandagariza ku Bworoherane

Musanze FC yatsinze APR FC ibitego 3-2 mu mukino wa munani wa Shampiyona wabaye kuri uyu wa Gatandatu tariki 22 Ugushyingo 2025 kuri Stade Ubworoherane yo mu Karere ka Musanze.

Ni umukino utigeze worohera APR FC kuko mu gice cya mbere bari bamaze kuyitsinda ibitego 3-0 kandi ubona ko irushwa cyane n’ubwo yacishagamo ikihagararaho nk’ikipe nkuru.

Ikipe ya Musanze FC yafunguye amazamu ku munota wa gatandatu ku gitego cyatsinzwe na Mutsinzi Charles yakiriye umupira mu rubuga rw’amahina ndetse ku munota wa 19 ibona igitego cya kabiri ku mupira wavuye muri koruneri maze Shaban Hussein Tshabalala azamuka ku kirere umupira awushyira mu izamu n’umutwe.

Ku munota wa 39 Musanze yongeye gutsinda igitego cya gatatu gitsinzwe na Bizimungu Omar akoresheje umutwe ari nako amakipe yagiye kuruhuka bihagaze.

Ku munota wa 61, APR FC, yabonye igitego cya mbere cyatsinzwe na Murangamirwa Serge ku mupira watewe na Mugisha Gilbert.

Ku munota wa 69 Musanze FC yasimbuje Tuyisenge Pacifique ajyamo havamo Katembo Lubila ku ruhande rwa wakinaga imbere ibumoso. Ku munota wa 72 Mugisha Gilbert yasimbuwe na Hakim Kiwanuka naho ku wa 79 Hakizimana Thity asimbura Lethabo Mathaba wavunitse ku ruhande rwa Musanze FC.

APR FC yabonye igitego cya kabiri ku munota wa 87 gitsinzwe na William Togui ku ishoti rigendera hasi yatereye mu rubuga rw’amahina ahawe umupira na Ronald Ssekiganda ndetse umukino urangira utyo n’ubwo hongeweho iminota irindwi.

Ibi byatumye Ikipe ya Musanze FC ifata umwanya wa kabiri ku rutonde rw’agateganyo rwa Shampiyona n’amanota 15 ikurikiye Police FC ifite 18 naho APR FC ijya ku mwanya wa 6 n’amanota 11.

Leave a Reply

Your email address will not be published. Required fields are marked *