Abadepite mu Nteko Ishinga Amategeko y’u Rwanda babajije Ubuyobozi bw’Urwego rw’Igihugu rushinzwe Imiyoborere, RGB, icyo iri ruri gukora kugira ngo ibibazo bimaze iminsi biri mu Ikipe ya Rayon Sports bikemurwe mu maguru mashya.
Ubwo RGB yagezaga Raporo y’ibikorwa by’umwaka wa 2024/2025 ku Nteko Ishinga Amategeko imitwe yombi, kuri uyu wa 19 Ugushyingo 2025, nibwo abadepite bayibajije icyo iri gukora kugira ngo ibibazo biri mu buyobozi bwa Rayon Sports bikemuke.
Hamaze iminsi humvikana ubwumvikane buke muri Rayon Sports buturutse ku ihangana hagati y’abagize Inama y’Ubutegetsi yayo ikuriwe na Muvunyi Paul na Komite Nyobozi iyobowe na Twagirayezu Thaddée kugeze ubwo hari n’abise abandi “Agatsiko k’amabandi”.
Hagaragaye kandi kudahuza ku bijyanye n’amategeko shingiro y’Umuryango, cyane mu gusobanukirwa umuyobozi uhagarariye Rayon Sports mu buryo bw’amategeko, kudashyigikirana mu bikorwa by’ikipe, kutumvikana ku mushinga w’akanyenyeri, igurwa ry’abakinnyi mu mpeshyi no ku byemezo byerekeye umutoza Afahmia Lotfi uheruka kwirukanwa.
Depite Pie Nizeyimana, yagaraje ko hakwiye kugira igikorwa mu maguru mashya kugira ngo uku kutumvikana n’umwuka mubi urimo bikemurwe.
Ati “Mu Muryango wa Rayon Sports hamaze igihe humvikana ibikorwa n’imvugo zitari nziza, usanga iyi miryango ikwiye kwitabwaho ngo bihabwe umurongo hakiri kare. Si ubwa mbere RGB yaba ikemuye ibibazo muri uyu muryango kuko no mu 2020 yigeze kubyinjiramo kandi ibiha umurongo mwiza.”
Yakomeje ati “Ukumva inzego ebyiri zitandukanye z’uyu muryango zatumiye inama zitandukanye, bisaba ko inzego zibireba neza, ukajya kumva ngo zahagaritswe kubera impamvu z’umutekano. Nabazaga nka RGB ifite imiryango itari iya Leta mu nshingano, muteganya iki ngo mwinjire muri uyu muryango, mufashe gukemura ibibazo bimaze iminsi bigagaramo?”
Depite Kanamugire James na we yagize ati “Nifuza ko umuyobozi yamara impungenge abakunda iyi kipe, ifite ibibazo bitandukanye hari abayobozi bari muri Nyobozi hari abandi bari mu Nama y’ubutegetsi usanga batari guhuriza hamwe bityo Umuyobozi Mukuru wa RGB yashyira umucyo kuri icyo kibazo kivugwa muri iyo kipe n’ingamba zihari zo kubishyiraho iherezo burundu ndetse n’izindi ngamba zanakurikizwa muri siporo kugira ngo umuturage abe ku isonga.”
Umuyobozi Mukuru wa RGB, Dr. Doris Uwicyeza Picard, yavuze ko bari gukora ibishoboka byose ngo ibibazo biri muri Rayon Sports bikemurwe hashingiwe ku kubahiriza amategeko kandi mu buryo buzishimirwa n’abakunzi bayo.
Ati “RGB dufite mu nshingano kwandika no gukurikira imikorere y’imiryango itari iya Leta na Rayon Sports ikaba ari imwe muri iyo miryango. Muri iyo nshingano dukurikirana uko iyo miryango yubahiriza amahame y’imiyoborere.”
“Rayon Sports ubu ngubu yavuguruye amategeko yayo ariko turi gukorana kugira ngo ayo mategeko abe ajyanye n’itegeko rigena imiryango itari iya Leta, tukaba dukomeza gukorana kugira ngo dufashe uwo muryango kubahiriza amategeko no kunoza imikorere ku buryo bwashimisha abakunzi bayo.”
