Impuzamashyirahamwe y’Umupira w’Amaguru muri Afurika, CAF, yemereye Al Hilal SC na Al Merrikh SC zo muri Sudani gukina muri Shampiyona y’u Rwanda bituma umubare w’amakipe yo mu cyiciro cya mbere n’imikino byiyongera.
Icyemezo cya CAF cyafashwe nyuma y’Inama ya Komite Nyobozi ya CAF, yateranye ku wa Gatatu, tariki ya 19 Ugushyingo 2025 yiga ku busabe bw’ayo makipe yamaze kwemererwa na FERWAFA.
Aya makipe yo muri Sudani yasabye uburenganzira Ishyirahamwe ry’Umupira w’Amaguru mu Rwanda, FERWAFA, kugira ngo akine muri Shampiyona y’u Rwanda, kubera ibibazo by’umutekano biri mu gihugu cyabo.
Al Hilal SC iri mu mikino y’amatsinda ya CAF Champions League, aho izakira MC Alger ku wa Gatanu, tariki ya 21 Ugushyingo 2025, saa Cyenda kuri Stade Amahoro.
