Akanama k’Umutekano k’Umuryango w’Abibumbye, kemeje ko hashyirwaho ingabo mpuzamahanga zo kugarura amahoro muri Gaza, n’uburyo buganisha ku bwigenge bwa Palestine n’ubwo Israel bahora bahanganye itabikozwa.
Mu nama yo ku wa 17 Ugushyingo 2025, abatoye uko ari ibihugu 15 bigize ako ka nama, 13 byatoye bishyigikira icyo gitekerezo naho U Bushinwa n’u Burusiya birifata.
Ibi byaje bishimangira igitekerezo cya Perezida Donald Trump wa Leta Zunze Ubumwe za Amerika uheruka kwerekana ko muri Gaza hakwiye kujyayo ingabo mpuzamahanga zishinzwe kugarura amahoro n’ubwo hari impungenge ko u Burusiya bushobora kuzifashisha ububasha bufite muri Loni butesha agaciro icyo icyemezo.
Icyemezo cyatowe kuri uyu munsi kandi, cyemeza ko muri Gaza hakoherezwayo ingabo, zo kugarura amahoro, kugenzura imipaka, kurinda abaturage no gukusanya intwaro ziri muri aka gace.
Ku wa 7 Ukwakira 2023 ni bwo Hamas yagabye ibitero kuri Israel, bihitana abarenga 1200 abandi barenga 200 bashimutwa n’uyu mutwe. Israel yahise igaba ibitero simusiga kuri uyu mutwe ndetse kugeza ubu habarurwa abagera mu bihumbi 69 bamaze kubigwamo.
