Umutwe Urwanya Ubutegetsi bwa DR Congo, AFC/M23 wigaruriye Uduce twa Maimingi turi muri Teritwari ya Shabunda mu Ntara ya Kivu y’Amajyapfo nyuma y’imirwano yabahuje na FARDC n’Ihuriro ry’imitwe bafatanya mu guhangana na M23 kuri iki Cyumweru.
Amakuru y’ifatwa ry’utwo duce, yamenyekanye kuri uyu wa Mbere tariki 17 Ugushyingo 2025, nyuma y’imirwano yatangiye mu gitondo kare ku cyumweru, ariko ntimare igihe kinini kuko FARDC n’abo bafatanyije muri iyo ntambara birutse rugikubita.
Abatuye muri utwo duce bemeza ko n’ubwo batari bizera neza umutekano, ariko ubuzima bwatangiye kugaruka kuko hari ituze ndetse n’abaturage batangiye kugenderana.
Imirwano yabaye nyuma y’amasaha macye muri Qatar, intumwa za RDC n’iza AFC/M23 zisinye amasezerano akubiyemo ingingo 8 zizaganirwaho kugira ngo hasinywe amasezerano ya burundu y’amahoro hagati y’izi mpande zombi.
Ni amasezerano asanze andi menshi ataratanze umusaruro, kuko Leta ya Congo ikomeza kugaba ibitero by’indege z’intambara na drone mu bice bigenzurwa na AFC/M23, bikururira aba barwanyi gukurikirana aho abo bahangana baturuka bakahigarurira.
