Abakozi 35, barimo aba officers ba RCS, abashinzwe kurengera uburenganzira bwa muntu mu magororero yo mu Gihugu n’abanyamategeko bahawe amahugurwa abafasha kurushaho kunoza no guteza imbere uburenganzira bw’abagororwa by’umwihariko abagore bafunze.
Aya mahugurwa y’iminsi ine, yatangiye kuri uyu wa kabiri tariki 11 ageza ku wa 14 Ugushyingo 2025, abayitabiriye bahuriza hamwe ubumenyi mu kurengera uburenganzira bw’abagororwa by’ubwihariko ubw’abagore baba bari mu magororero.
Aya mahugurwa yateguwe n’Umuryango Uharanira Uburenganzira bwa Muntu, ARDHO, ku bufatanye n’Ishami ry’Umuryango w’Abibumbye ryita ku burenganzira bwa muntu. Agamije kumenyekanisha uburenfanzira bwa muntu cyane cyane ku vari mu magororero kuko hari a ashobora kwitiranya ko abagororwa badafite uburenganzira.
Umunyamabanga Nshingwabikorwa w’Umuryango Ugaranira Uburenganzira bwa Muntu, Munyagasiza Jonas, avuga ko aya mahugurwa agamije kongerera ubumenyi abakozi b’Urwego rw’Igihugu Rushinzwe Igorora no kubongerera ubumenyi mu mategeko nk’abantu bashinzwe amagororero.
Yagize ati “Abantu bafunze hari abantu bazi y’uko batagira uburenganzira, uburenganzira batagira ni ukugenda wenda ngo basure bene wabo hanze, ariko ibindi byose bisaba umuntu ni ngombwa ko babibona harimo kurya, harimo ubuzima, harimo kwiga, uburenganzira bwose muzi tugira hano hanze nabo bakagombye kuba babufite.”
“Rero aya mahugura ni ukugira ngo tubwire Urwego rwa RCS uburenganzira bw’abagororwa, ikindi tunababwire n’ibibazo tugenda dusanga mu magororero.”
Munyagasiza, akomeza avuga ko n’ubwo uwakoze icyaha aba agomba kugihanirwa, bari kureba uburyo ibihano byinshi bitasimbuzwa igifungo kuko akenshi usanga hari igihe igifungo kugira inkurikizi cyane cyane ku bagore bagororwa zishobora no gusenya umuryango.
Ati “Ni ubufasha dutanga nta kiguzi icyo hihe rero dushyira imbaraga cyane kuri bariya bantu basize umuryango nibo tureba ndetse ubu turimo turanatekereza uburyo ese leta itekereza niba umugabo n’umugore bose bakose icyaha bakaba bafunze, bariya bana barimo baratekerezwaho cyangwa basigara aho, ese bariya bana sibo bari mu muhanda?”
Umuvugizi w’Urwego rw’Igihugu Rushinzwe Igorora, CSP Sengabo Hilary, ahamya ko ayo mahugurwa azafasha abayitabiriye kurushaho kunoza amategeko nk’uko biri no mu ndangagaciro zabo agasaba abantu gukomeza kwizera urwo rwego.
Ati “Ni igikorwa dufatanyijemo n’abafatanyabikorwa bacu mu rwego rwo guhugura ku burenganzira bwa muntu ariko by’umwihariko abari mu igirorero, bizabafasha mu guhuza amategeko n’uburenganzira bw’abantu bafunze.”
“Ubucucike bwavuye mu 130 bugera ku 103, murumva ko mu gihe gito ubucucike buzaba bacitse. Ubutumwa dutanga ni uko abantu bakomeza kugirira icyizere amagororero kuko tubaha serivisi yubahirije amategeko.”
NCHR yagaragaje ko urwego rw’ubucucike rwavuye kuri 134,3% rugera kuri 110%, naho mu mpera za Kanama 2025 rugera kuri 103,8%, bisobanuye ko hasigaye ubucucike bwa 3,8% gusa.
