Inzobere Dr. Liam Scott, yahamirije Urwego rw’Umuryango w’Abibumbye rwasigariyeho inkiko mpanabyaha mpuzamahanga (IRMCT) ko gutwara Kabuga Félicien mu ndege yihariye imucyurwa mu Rwanda nta ngorane zishobora kubamo.
Kabuga Félicien, warezwe ibyaha bya Jenoside yakorewe Abatutsi, mu 2023, IRMCT yafashe umwanzuro wo guhagarika kumuburanisha ishingiye kuri raporo z’inzobere zagaragazaga ko ubuzima bwe bwahungabanye ku buryo atashobora gukomeza kuburana kuko yari afite indwara yo kwibagirwa iterwa n’izabukuru.
Ubushinjacyaha bwa IRMCT bwo bwasabye uru rwego ko yakoherezwa mu Rwanda aho gukomeza kuba mu nyubako za Loni no gukomeza gutungwa nayo ndetse tariki ya 9 Nzeri, Ubushinjacyaha bwibutsa abacamanza ko n’u Buholandi buherereyemo gereza ya IRMCT bwarahiye ko butazakomeza kumucumbikira.
Abunganizi ba Kabuga banze igitekerezo cyo kumwohereza mu Rwanda, bagaragaza ko bitewe n’uburwayi afite, kumutwara mu ndege isanzwe y’ubucuruzi n’iyahariwe abarwayi bitashoboka, kuko uru rugendo rurerure rwahungabanya ubuzima bwe kurushaho.
Kugira ngo abacamanza bemeze ishingiro ry’igitekerezo cy’aba banyamategeko cyangwa se bagiteshe agaciro, basabye Dr. Scott kugaragaza uko byagenda Kabuga abaye acyuwe mu Rwanda, ashingiye ku buhanga no ku bunararibonye afite.
Inkuru dukesha IGIHE, ivuga ko Dr. Scott, yasobanuye ko mu bufasha rusange abaganga batanga harimo gusuzuma umuvuduko w’amaraso y’umurwayi, uko umutime we utera, kumwongerera umwuka wa oxygen, kumuha ifunguro n’amazi, ariko ko indebe yo ishobora kwitabwaho hifashishijwe imashini kabuhariwe ziba mu ndege.
Yanzuye ati “Nshingiye ku makuru mbashije kubona, nsanga gutwara mu ndege y’abarwayi umurwayi ugeze mu zabukuru, ufite intege nke, ukoresha igare ry’abafite ubumuga kandi urwaye indwara yo kwibagirwa hamwe n’izindi zidakira, mu rugendo ruhuza ibihugu, byakorwa mu buryo bworoshye kandi budateza ingorane, bigakorwa n’abaganga babizobereye, biteguye neza kandi bafite ibikotesho bihagije.”
Biteganyijwe ko raporo ya Dr. Scott izasuzumwa na IRMCT kandi ntishobora kubahirizwa mu gihe umuryango wa Kabuga n’abanyamategeko be batarava ku izima ngo bemere ko acyurwa mu Rwanda. Ibyo ariko na byo bimwongerera ibyago byo gukomeza gufungwa mu gihe atarabona ikindi gihugu kimwakira.
