Umunya-Politiki utavuga rumwe n’Ubutegetsi bwa Perezida Museveni akaba n’Umukandida bahanganye, Robert Kyagulanyi uzwi nka Bobi Wine yifashishije indirimbo “Nzi ibyo nibwira” ya Israel Mbonyi mu kwiyamamaza mu gace ka Kisoro.
Ubwo Robert Kyagulanyi, yageraga mu gace ka Kisoro gaherereye mu mu Burengerazuba bwa Uganda mu kilometero bike n’u Rwanda, kuri uyu wa 12 Ugushyingo 2025, yasanze abaturage bakubise buzuye nawe ahita abaririmbira indirimbo Nzi ibyo nibwira y’Umuhanzi Nyarwanda, Israel Mbonyi ukunzwe cyane mu karere no mu maganga.
Bobi Wine wishimiye ibihe byiza yahagiriye, yanyuze ku rubuga rwe rwa TikTok, agira ati “Nubwo mvuye Kisoro, igice cy’umutima wanjye kirahasigaye. Mwarakoze ku bw’urukundo.”
Robert Kyagulanyi Ssentamu wamenyekanye nka Bobi Wine w’imyaka 43, ni umuyobozi w’ishyaka rya ‘Nation Unity Platform’ ni inshuro ya kabiri ari guhatanira kuyobora Uganda nubwo ubushize atigeze ahirwa.
Abakurikiranira hafi ibya politiki yo mu karere Uganda iherereyemo, bemeza ko Robert Kyagulanyi Ssentamu kuri iyi nshuro yiyamamaza, umubare w’abamushyigikiye wazamutse ariko bigoye ko washingirwaho bemeza ko yatsinda Yoweri Kaguta Museveni ugiye kumara imyaka 40 ayoboye Uganda.
Muri aya matora ateganyijwe muri Mutarama 2026, abakandida umunani biyamamariza umwanya wa Perezida muri Uganda batangiye ibikorwa byo kwiyamamaza ku wa 29 Nzeri 2025, bikazageza tariki 12 Mutarama 2026, ubwo amatora azaba agiye kuba.
Robert Kyagulanyi uzwi nka Bobi Wine w’Ishyaka rya National Unity Platform, mu matora ya 2021 yari yagize amajwi 35%. Perezida Yoweri Kaguta Museveni agira amajwi 58%.
