Musanze: 5 barimo Gitifu, SEDO b’akagari n’abayobozi mu midugudu batawe muri yombi bazira ruswa mu myubakire

Umunyamabanga Nshingwabikorwa n’Ushinzwe imibereho myiza n’iterambere, SEDO, umukozi wa DASSO umwe n’abayobozi b’imidugudu 2 mu Kagari ka Cyabagarura mu Murenge wa Musanze mu Karere ka Musanze batawe muri yombi bazira uburangare na ruswa mu myubakire.

Abatawe muri yombi bari kuri Sirasiyo ya, RIB, ya Cyuve kugira ngo babazwe kubyo bakurikiranyweho harebwe uruhare rwa buri wese.

Umuyobozi w’Akarere ka Musanze, Nsengimana Claudien, yemeje aya makuru avuga ko hari amakosa y’uburangare bakoze mu myubakire, ariko ko bari no gukurikiranwa kugira ngo harebwe niba nta byaha bindi byakozwe.

Yagize ati “Ayo makuru niyo, hari abayobozi bakurikiranyweho imikorere idahwitse, aho bagize uburangare abaturage bakubaka mu buryo bw’akajagari nta byangombwa, bakubaka ahataragenewe inyubako cyangwa se ahagenewe ubuhinzi n’amashyamba, ariko inzego zibishinzwe zikaba ziri gukurikirana kugira ngo harebwe uruhare rwa buri wese.”

“Uyu munsi rero bari mu nzego z’ubugenzacyaha kuko birashoboka ko haba harimo andi makosa yakurikiranwa. Nta kibazo bitera kubera ko urwego rw’umurenge n’urw’akarere biroroshye koherezayo abandi bakajya gufasha mu gihe dutegereje ikizakurikira.”

Meya Nsengimana, yakomeje agira inama abaturage ko mu gihe bakeneye kubaka bajya begera inzego zibishinzwe zikabafasha ndetse bagakoresha n’ikoranabuhanga mu kureba ko aho bagiye kubaka hemewe bakirinda ababashuka ko bazabafasha bakabatura mu bihombo.

Ati “Ubutumwa duha abaturage ni uko iyo uteganyije umushinga wo kubaka ugomba kugana inzego zibishinzwe, ukubaka wubahirije amabwiriza kugira ngo udakora ibidakwiriye, bakirinda ababashuka ngo barabafasha. Abayobozi bo turabasaba guha abaturage serivisi bakabarinda kugwa mu makosa bitari ngombwa.”

Umujyi wa Musanze ugenda utera imbere kuko uri mu mijyi yunganira Kigali aho usanga imirenge myinshi yaho yaragenewe guturwa ariko hagaturwa hubahirizwa igishishanyo mbonera kugira ngo hirindwe akajagari mu miturire.