Umuvugizi w’Umutwe Witwaje Intwaro wa M23, Lt Col Willy Ngoma, yemeje ko bafite imbaraga zo gutsinda Ingabo za Repubulika Iharanira Demokarasi ya Congo n’abayifasha ku rugamba kandi ko batazarebera nibakomeza gushotorwa.
Hashize iminsi itari mike imirwano yongeye kwaduka mu bice bigenzurwa na AFC/M23 muri Kivu y’Amajyepfo aho Ingabo za D R Congo, FARDC, n’Ihuriro Wazalendo ndetse n’Ingabo z’Uburundi zashakaga kwigarurira bimwe mu bice bambuwe.
Mu bice ihuriro ry’ingabo za RDC zigambye kwambura M23 harimo Kibati, Gurupoma ya Luberike muri Teritwari ya Walikale, gusa nyuma y’iminsi ibiri byavuzwe ko M23 yabisubiranye, Wazalendo ihungira ahitwa Miba.
Mu kiganiro na Voice of Kivu, Lt Col Ngoma yatangaje ko nta bice ihuriro ry’ingabo za Leta ya RDC ryafashe, ahubwo rikomeje kugaba ibitero bikomeye mu bice bituwe cyane bakica avaturage.
Yagize ati “Niba uvuga kwagura ibirindiro, si byo. Nta na santimetero imwe bafashe. Bakomeza kurasa ibisasu buhumyi, barasa aho abaturage bari. Barasa ibice bituwe cyane.”
Yakomeje avuga ko abarwanyi ba M23 bashaka amahoro ariko ko mu gihe ibice bagenzura bigabwaho ibitero, badashobora kurebera, ahubwo ko bagomba gusubizanya imbaraga bafite kugira ngo abaturage batekane.
Ati “Dushaka amahoro. Iyo tuvuga ko dushaka amahoro, ntibiba bivuze ko niduterwa, tutazasubiza. Tuzasubiza icyaba cyose. Dufite imbaraga zo kubatsinda, baratsindika.”
