Kuri uyu wa Gatandatu tariki 8 Ugushyingo 2025, Abapolisi n’Ingabo z’u Rwanda ziri mu butumwa bwo kubungabunga umutekano muri Mozambique bifatanyije n’abaturage mu muganda rusange.
Igikorwa cy’umuganda cyabereye mu Mujyi wa Mocímboa da Praia uherereye mu Ntara ya Cabo Delgado kibanda ku gusukura uyu Mujyi wari warazahajwe n’intambara.
Mu butumwa yatanze ku bitabiriye uyu muganda, Helena Bandeila, uhagarariye Intara ya Cabo Delgado, yashimiye ingabo z’u Rwanda n’iza Mozambique ku ruhare rukomeye bagira mu kubungabunga amahoro n’umutekano muri ako gace, asaba abayobozi n’abaturage b’ako gace gukomeza kwitabira umuganda wa buri kwezi kugira ngo ibikorwa by’isuku n’iterambere bikomeze gushyirwamo imbaraga.
Kuva mu 2021, inzego z’umutekano z’u Rwanda ziri muri Mozambique mu bikorwa byo gutsinsura ibyihebe byari byarayogoje Intara ya Cabo Delgado iri mu Majyaruguru y’icyo gihugu.
Kuva icyo gihe Ingabo z’u Rwanda na Polisi y’u Rwanda byatanze umusanzu ukomeye mu kwirukana ibyihebe mu bice bitandukanye, abari barahunze basubira mu byabo.
