Kwizera Emelyne wamenyekanye nka “Ishanga” no kurikoroza ku mbuga nkoranyambaga ubwo hakwirakwizwaga amashusho ye y’urukozasoni yabatijwe mu mazi menshi avuga ko yakiriye agakiza.
Ubutumwa yanyujije ku mbuga nkoranyambaga, Emelyne yasangije abamukurikira amafoto abatizwa, ahamya ko Imana yamurokoye ndetse arushaho kuyishimira.
Ati “Ndabizi biragoye kubyiyumvisha gusa niko biri, ndagushima Yesu ku bw’ubuntu bwawe ndetse n’urukundo rwawe. Ndagushimira ku bw’agakiza kawe wampereye ubuntu ntabwo nari mbikwiriye, nari mubi, nari ikivume, nari uwo gucirwaho iteka, nari uwo gupfa, nari mfite amazina mabi umpa izina rishya, Inshuti ya Yesu, Hallelujah.”
Yakomeje agira ati “Wankuyeho wa mwenda w’isoni unyambika umwenda wera, ndagushima Yesu ko wankuye mu maboko y’umwanzi ndashimira amaraso yawe y’igiciro cyinshi yanyogeje ibyaha byanjye, ndashima umusaraba, ndashima ya mva nziza ariko cyane cyane ndashima umwami Yesu.”
Emelyne wakoresheje cyane ubutumwa buboneka muri Bibiliya 2 Abakorinto 5:17, yagize ati “Umuntu wese iyo ari muri Kirisitu aba ari icyaremwe gishya, ibya kera biba bishize. Dore byose biba bihindutse bishya. Kandi umwanzi cyangwa iby’Isi byose ntibizongera kuntera ubwoba ukundi.”
Yagaragaje ko ubu icyo kwiratana afite ari uko yakiriye Yesu nk’umwami n’umukiza kandi ko yizera ko yapfanye nawe akazukana nawe.
Mu ntangiriro za 2025 uyu mukobwa yararikoroje nyuma y’uko hagiye hanze amashusho ye y’urukozasoni bikaza kumuviramo gutabwa muri yombi ari kumwe na bagenzi be.
Iperereza ryagaragaje ko ibyo bikorwa by’urukozasoni babikoreshwaga n’ibiyobyabwenge bibaviramo kwisanga mu kigo ngororamuco bamazemo igihe.
