Komisiyo y’Amatora muri Tanzania yatangaje ko Umukandida Perezida Samia Suluhu Hassan, yatsinze amatora y’umukuru w’igihugu kuko yabonye amajwi 97,66% by’abatoye barenga miliyoni 31.
Ibi byatangajwe na Perezida wa Komisiyo y’Amatora, Jacobs Mwambegele, kuri uyu wa 1 Ugushyingo 2025, yemeza ko Samia Suluhu Hassan ariwe watsinze amatora yabaye ku wa gatatu tariki 29 Ukwakira 2025.
Komisiyo y’Amatora yavuze ko Samia yabonye amajwi arenga miliyoni 31,9 bingana na 97,66% by’abatoye bose ku bwitabire bwari kuri 87% kuko abiyandikishije gutora bari miliyoni 37,6.
Aya matora yaranzwe n’imvururu z’abigaragambya biganjemo abari mu rubyiruko rwasabaga ko habaho impinduka mu miyoborere y’igihugu banenga ko abatavuga rumwe n’ubutegetsi babangamiwe mu bikorwa byo kwiyamamaza abandi bagafungwa ndetse hakaba hari n’abatari bake bamaze kugwa mu myigaragambyo yamagana ibyo bikorwa.
Nyuma y’itangazwa ry’ibyavuye mu matora, imyigaragambyo yabaye myinshi mu Mijyi ya Dar es Salaam, Arusha na Dodoma, aho abaturage benshi bavugaga ko amatora atabaye mu mucyo.
Ni amatora ya mbere Perezida Samia w’imyaka 65 yari yitabiriye nk’umukandida mukuru kuva yasimbura nyakwigendera John Pombe Magufuli mu mwaka wa 2021.
Ishyaka rikomeye ritavuga rumwe na Leta, CHADEMA, ryatangaje ko abantu basaga 700 bishwe, mu gihe inzego za Leta zavuze ko abapfuye ari bake cyane.
Imiryango mpuzamahanga irimo Umuryango w’Abibumbye (ONU) n’amashyirahamwe y’uburenganzira bwa muntu yasabye ko hakorwa iperereza ryigenga kugira ngo hamenyekane ukuri ku byabaye.
Leta ya Tanzania yashyizeho amasaha ya ‘Guma mu rugo’ mu bice bimwe na bimwe by’igihugu, ndetse ibuza imikoreshereze ya interineti, ivuga ko ari ukugira ngo habeho ituze.
